1Ti 1 | MMX | STEP | Nenia ne Pol, laradi vavang at ne Iesu Karisito, mo nedik ta doxoma voovo rin. Nedu mi ne Moroa, Laradi Loklox Arooro atdik, duga soxolik ka ia ri na lugugu.

1 Timothy 1

Lavapaase Axasep

1 Nenia ne Pol, laradi vavang at ne Iesu Karisito, mo nedik ta doxoma voovo rin. Nedu mi ne Moroa, Laradi Loklox Arooro atdik, duga soxolik ka ia ri na lugugu.

2 Nia a malagan na lovoang ti ne Timoti, lamdak tinotno rak maxeneng at legesa nuunu.

Letaba nabalamu, lebelemumu, la limila bok tu boro at ne Temen dik la ne Iesu Karisito, Leeme Silok atdik.

Levempapaase Aronga Mumu Leveloklox Ase Xaxarang

3 Nia a vara i do una nemen go Epesas, kerekngan aga tong i ru ap mo laaleng nia aga vas kaxat uto Masadonia. Leventaba luvuttadi me go Epesas di vanasa limixin mi levenanasa xaxarang; kuren la una tong i ridi do dina xap ta ap mo loklok. 4 La una tong i ridi do dina xap ta ap mo laxampapaase solo mumu leventetere, la levenasen at lavalabat, mila nai ik lox asu mun levenedak; la ik lox asi lugugu at ne Moroa, mo lugugu i lox alolos lunuunu at limixin. 5 Lavasuun at nai levelinga rak, ti lox axatu labalamu xantubu at limixin nuunu; nom labalamu i ravasu boro xeneng at lorooro kopmen taxakapmek teren la boro bok at lodoxoma, kopmen tusumsuma xapmek teren la boro bok at lunuunu ruturun. 6 Leventaba luvuttadi digara rem gili su vam basinge i na la dira domampe vam langas at lunuunu la di tong asu mun levelinga kopmen tavasuun teren. 7 Di vara i do dina anasa limixin mi Lenavolo at ne Moroa, ketla dixo xasep teren la dixo xasep bok ap mo levelinga di anasa limixin min.

8 Nedik ataklen i do Lenavolo i lox avukat, mo do tara im tebeng avukar i. 9 Ataklen box i do Lenavolo at ne Moroa, kopmen tinedi limixin avukat, ketla tinedi limixin di los polo Lenavolo, la tinedi limixin tongtonga xepe, la tinedi limixin kopmen dina lotu saparap ne Moroa, la ti luvuttadi xapmek, la tinedi bok kopmen dina lok ngangao at ne Moroa la levempanga at lotu, la tinedi dip sev amet luvuttemen di mi luvutnen di, la tinedi dip sev amet limixin petpes, 10 la tinedi bok di lok laxakapmek maxamang at lixitkis epot, la tinedi lavatlok di velongka, la tinedi bok di babala ka limixin kusu dina gugu atdi; la tinedi bok di xaxarang la di tong asu levelinga xaxarang mumu laradi i tu at lavapaase; tinedi bok di lok levempanga xerepmo xopmen na epovo mi levelinga ruturun at ne Moroa. 11 Na levelinga ik lok to xeneng at Lagale Lavavang, mo ne Moroa ga raba ia min, kusu ana tong asu i. Lagale Lavavang ne Moroa i lox asuusu lisisixam at ne Moroa, kuren la ata emi asu mi ne Moroa.

Pol Ga Tong Avukat Mumu Labalamu At Ne Moroa

12 A tong avukat ti ne Iesu Karisito, Leeme Silok atdik, ni gara raba vam ia mi lololos ti lok lugugu rak. A tong avukat tinotno rin mila ni ga ven ia do nenia laradi ruturun, la ni ga soxolik ka ia xusu ana gugu rin. 13 Keke i do gano migomgo aga paase vupu rin, la agap sep limixin teren, la agak lox asongot di. Ketla ne Moroa ga lox asuusu lebelemumu ren tia, mila nenia agoxoklen levempanga salai gak mokso la goxopmen tunuunu rak. 14 La Leeme Silok atdik ga sobang asi mo letaba nabalamu ren mavana rak la ga raba box ia mi lunuunu la labalamu, no i ravasu at ne Iesu Karisito.

15 Anai levelinga ruturun tidik, ata siam ka i la ata nuunu bok teren. Iesu Karisito ga si ude xopok at na lavatbung menemen kusu ri lox arooro limixin kapmek. Loklok kakapmek tarak i silok aleng ti loklok kakapmek atnedi. 16 Ketla ni lavasuun mun teren la ne Moroa ga lox asuusu lebelemumu ren tia, kusu ne Iesu Karisito na ngangais aleng tia ri leeng basinge leveloklok kakapmek tarak, keke i do nenia laradi a lok kapmek aleng ti limixin axap. La nai loklok at ne Iesu Karisito, ni lampoovo rinedi limixin axap diba nuunu ren la dina lok ka lorooro avolo. 17 Kuren la ata emi asu mi Loorong Silok naba rooro amisik, la kopmen noxo met la dik taxo epovo ri ven i; neni xusuk mun ne Moroa. Ata lox asuusu amisik loklok ngangao la leemi asu rin! Tuturun.

18 Timoti, nenu lamdak tarak. Ana raba u mi na levelinga i epovo mi levelinga vapaase alii at lugugu ram saparap ne Moroa gano migomgo. Do una mumu asu i, ba lox alolos u xusu unaba esep avukat ap mo leesep nunuan, 19 la ubam tebeng lolos lunuunu la u noxo suma loklok mamangan at lorooro ram. Leventaba luvuttadi diga ronga xepe na levelinga, la diga lok kapmek pam lunuunu atdi. 20 Kantubu atdi, ne Aimenias la ne Aleksanda, aga song araba vam du ri lekngen ne Satan, kusu dubaklen ka i do du noxo paase vupu ri ne Moroa.